තරු කුමරු

සඳ දෙවිඳුගෙ එළිය වැටුන
පුංචිම මල් පොහොට්ටුවක්
ඉකිබිඳිමින් කඳුළු සලන
දුටුවා එක තරු කුමරෙක්

තරු කුමරුගෙ හිත උණු වී
වැඩියා මේ මිහි තලයට
පුංචි මලට හෙමින් ලන්ව
ඇසුවා ඇගෙ තොරතුරු හැම

මල කීවා ඇගෙ කතාව
ඉකිබිඳිමින් නොනැවතීම
තරු කුමරුගෙ දෑස් වලින්
උණු කඳුළැලි ගලනකන්ම

සඳ දෙවිඳුව කෝප නොකර
යා යුතු ඔහු අහස් ගැබට
එනුමුත් බැහ මල අතහැර
දමා යන්න මෙහි තනිකර

හිරු කුමරිය වඩින මොහොතෙ
සඳ දෙවිඳුන් පහත බලන
දුටුවා මේ තරු කුමරුන්
පෙම් බැඳ ඇති පුංචි මලට

හිරු කුමරිගෙ ආදරයෙන්
සඳ දෙවිඳුගෙ සිත නිවුනා
පුංචි මලට තනියක් නෑ
තරු කුමරුන් ලඟ රැඳුනා

හිරු හා සඳු ආසිරි මැද
මල අයිතිය තරු ගත්තා
තරු කුමරුගෙ ආදරයෙන්
පුංචි මලේ හිත පිරුනා

~kushi~